БИШКЕК, 5-апр — Sputnik. Ысык-Көлдөгү төрт пансионатты Кыргызстандын ээлигине өткөрүү маселеси Өзбекстандын колунда рычагдар бар болгонунан улам чечилбей келген. Бул тууралуу маалымат жыйында экономика министри Арзыбек Кожошев билдирди.
Анын айтымында, акыры бул маселенин аягына чекит коюлду. 1992-жылдагы келишимге ылайык, өлкөнүн аймагындагы бардык объектилер ошол мамлекеттин менчиги деп эсептелет. Пансионаттар Кыргызстандын аймагында болгону менен, иш жүзүндө Өзбекстандын жарандары үчүн иштеген. Бирок эми гана өлкө жетекчилиги саясий эрктүүлүгүн көрсөттү, дейт Кожошев.
"Эмне үчүн буга чейин маселе чечилген эмес? Алардын колунда көп рычагдар, мисалы газ болгон. Ошондой эле биз Борбор Азия бириккен энергетикалык алкакта болчубуз. Эми "Датка — Кемин" электр линиясы курулгандан бери энергетикалык жактан көз карандысыздыкка жетиштик. "Түндүк — Түштүк" альтернативалык жолу курулуп жатат, "Газпром" көгүлтүр отунга байланыштуу маселебизди да чечти", — деди министр.
Мындан тышкары, экономика министри келишимден улам эч кандай эл аралык соттук териштирүүлөр болбой турганын кошумчалады. Ал "пансионаттарга каражат жумшап инвестиция салган өзбек ишкерлерине компенсация төлөнөбү?" деген суроого кийинчерээк жооп берүүнү убада кылды.
"Салык, социалдык фонд жана электр энергиясы боюнча карыздары бар экен. Ошондой эле алар пансионаттарды өнүктүрүү боюнча өздөрүнүн инвестициялык келишимдерин аткарбай, 20 жыл бою киреше алып турушкан", — дейт Кожошев.
Дүйшөмбү күнү өкмөт башчы Темир Сариев Ысык-Көлдүн жээгиндеги буга чейин Өзбекстан пайдаланып келген объектилерди Кыргызстандын мамлекеттик менчигине өткөрүү жөнүндө өкмөттүн токтомуна кол койду.
Чечим өкмөттүн кезексиз жабык жыйынында кабыл алынды. Кыргызстандын менчигине Өзбекстан пайдаланып келген Ысык-Көлдүн күңгөйүндөгү "Алтын кум", "Рохат", "Дилором" жана тескейинде жайгашкан "Бустон" пансионаттары өтөт.
Анын айтымында, Өзбекстан өзүнүн аймагындагы объектилерди СССР кулагандан кийин эле мамлекеттин менчигине өткөргөн.
