БИШКЕК, 7-апр. — Sputnik. Күзүндө өтүүчү Дүйнөлүк көчмөндөр оюндарына ыктыярчылар тартыла турганын Тарых жана маданият жылын өткөрүү боюнча мамлекеттик дирекция билдирди.
Маалыматка ылайык, жарыяланган сынакка Кыргызстандын бардык жарандары, ошондой эле республикада жашап, расмий каттоодон өткөн чет элдиктер катыша алат.
Ыктыярчы болууну каалагандардан резюме 20-апрелден тарта кабыл алынып, 30-апрелге чейин тандоо жүрөт. 1-майдан 30-майга чейин ыктыярчылар окутулат.
Эскерте кетсек, Көчмөндөр оюндары 3-8-сентябрь күндөрү Көл жээгинде өтөт. Маданий иш-чаралары үчүн "Кырчын" жайлоосу белгиленип, ал эми спорттук мелдештер Бактуу-Долоноту айылындагы ипподромдо тартууланат.
