БИШКЕК, 8-апр. – Sputnik. "Хизб ут-Тахрир"диний экстремисттик уюмунун издөөгө алынган төрт мүчөсүнүн бирөөсү кармалды. Бул тууралуу Улуттук коопсуздук комитетинин маалымат кызматы билдирди.
"Ысык-Көл облусунда жашаган 42 жаштагы жарандын үйүнөн көп сандаган тыюу салынган китепчелер менен электрондук форматтагы маалыматтар табылды", — деп айтылат маалыматта.
Табылган материалдар Дин иштери боюнча мамлекеттик комиссияга жөнөтүлгөн. Ал жактан теологиялык экспертиза жүргүзүлөт.
Учурда аталган ишке Кылмыш жаза кодексинин биринчи бөлүгүнүн 299-2 беренеси боюнча кылмыш иши козголду. Ал эми шектүү жаран убактылуу кармоочу жайга камалды.
