БИШКЕК, 9-апр. — Sputnik. Тоолуу Карабах чыр-чатагындагы тараптар эки жак чектешкен жерден каза болгондордун сөөгүн жыйнап кетүүгө 18:00дөн (Бишкек убактысы боюнча) тарта үч саат убакыт берилди. Бул туурасында Азербайжандын Коргоо министрлигинен билдиришти.
"ЕККУ жана эл аралык Кызыл Чырым уюмунун өкүлдөрүнүн кийлигишүүсү менен Москва убактысы боюнча саат 15:00дөн 18:00гө чейин согуш талаасынан өлүктөрдү издеп таап, алып чыгып кетүүгө убакыт берилди", — деп билдирди маалымат кызматы.
Азербайжан менен Армения Тоолуу Карабахтын айынан 1988-жылдын февралынан бери чатакташып келет. Анда армян эли басымдуулук кылган Карабах автономиялуу облусу Азербайжандын курамынан чыкканын билдирген. 1991-жылдын сентябрь айында борбор калаа болгон Степанакертте Тоолуу Карабах Республикасынын түзүлгөндүгү жарыяланган. Азербайжан андагы аскерий чыр-чатактан кийин Карабахка көзөмөл кыла албай калган.
