БИШКЕК, 13-апр. — Sputnik. Ысык-Ата районунун Киргшелк айылында үч аялдын өлтүрүлүшү боюнча иликтөө иштеринин жүрүшүндө 19 жыл мурун жасалган оор кылмыштын бети ачылды. Бул тууралуу ИИМ билдирди.
Маалыматка ылайык, 1997-жылы Россиянын Алтай крайында Ысык-Көлдүн Түп районунда төрөлгөн 1975-жылкы Евгений аттуу жаран эки кишини бычактап өлтүрүп качып кеткен. Ага издөө эки жыл өткөндөн кийин гана жарыяланган.
19 жылдан бери кылмышкер Кыргызстандын аймагында жашырынып, Ысык-Ата районунда жашап келген. Аты-жөнүн эки ирет алмаштырганы айтылууда.
Текшерүү маалында анын үйүнөн 25,5 грамм марихуана табылган.
Тергөө бөлүмүнө өткөрүлүп, учурда аталган жарандын иши боюнча иликтөө иштери улантылууда.
