БИШКЕК, 16-апр. — Sputnik. "Аламүдүн-1" кичи районунда жана энергетиктер шаарчасында жаңы өсүп келе жаткан бактар кыйылып жаткандыгы тууралуу маалыматты Sputnik Кыргызстан агенттигинин окурманы WhatsApp-канал аркылуу билдирди.
Бак кулап адам өмүрүнө забын болгондон кийин мэрия кооптуу делген бактарды кыюуну баштаган. Мэр Албек Ибраимов кыйыла турган бактарды аныктап, муктаждык болсо бул ишке башка структурадагы адистерди тартууну тапшырган.
Бирок окурмандардын айтымында, учурда жаңы кооптуулук жараткан бак-дарактардан тышкары, жаңы өсүп келе жаткандары да кыйылып жатат.
"Зеленстрой" ишканасынын директору Токтобек Элгондиев жаш бактардын кыйылышын арыктарды ремонттолушу менен байланыштырды.
"Биз ушу тапта шаар боюнча 400 бакты кыйдык. Бул ушунча бактын кыйылышын тастыктаган комиссиянын расмий жыйынтыгы гана", — деди Элгондиев.
Ал эми "Аламүдүн-1" кичи районундагы бактардын кыйылышын Элгондиев кооптуу жагдайдын алдын алуу үчүн жасалган аргасыз кадам деп атады.
"Ал жерге жаңы жол түшкөн, ирригациялык системалар ремонттолуп жатат. Бактар туура эмес өсө баштаган, муну адистердин баары тастыкташты. Алар адам жашоосуна кооптуулук жаратууда. Алардын ордуна жаңыларын отургузабыз", — деди жетекчи.
Мындай аргасыздыктан улам аталган кичи район менен бирге энергетиктер шаарчасындагы бактар да кыйылып жатат. Мэриянын айтымында, 27-апрелге чейин "кооптуу" деп табылган бактар кыйылат.
