БИШКЕК, 19-апр. — Sputnik. Жаздан бери "Зеленстрой" муниципалдык ишканасы 2444 бакты бутап, 129 даракты кыйган. Бул тууралуу мэрия билдирди.
Маалыматка ылайык, бактар өз маалында жана шаар тургундарынын, мекемелердин билдирүүсү менен кыйылууда.
"Жалпы жонунан борбор калаанын аймагындагы кооптуу делген 2936 бак текшерилген. Мында Биринчи Май районунда — 613, Ленин районунда — 1225, Октябрь районунда — 527 жана Свердлов районунда — 1571 дарак кароодон өттү", — деп айтылат билдирүүдө.
Жолдорду кеңейтүү максатында анын боюндагы 52 дарак жана кооптуулук жараткан 40 бак кыйылган.
Мыйзамга ылайык, кыйылган жыгач "Зеленстрой" ишканасынын балансына өтөт. Учурда мекемеде 400 куб метр кыйылган бак бар экени белгилүү болду. Даяр отунду шаар башчысы Албек Ибраимов калаадагы аз камсыз үй-бүлөлөргө таратып берүүнү тапшырды.
