БИШКЕК, 21-апр. — Sputnik. Эквадордогу жер титирөөдөн каза болгондордун саны 570 адамга жетти деп билдирди Ассошиэйтед Пресстин берген маалыматына таянган РИА Новости.
Бул сандарды мамлекеттин башчысы Рафаэль Корреа айтты. Буга чейин 553 адамдын каза тапкандыгы айтылган.
Ал арада президент Корреа Түштүк Америка өлкөлөрүнө чукул кырдаал учурларда тобокелдиктер боюнча иш алып барган бирдиктүү министрликти түзүү сунушун айтты. Бул сунуш Эквадордогу зилзала трагедиясынан кийин киргизилди.
Ал эми өлкө ичинде мамлекет башчысы телекайрылуу жасап, жер титирөөнүн кесепетин жоюу үчүн кошумча нарк салыгынын жана киреше боюнча төлөмдүн көлөмүн убактылуу көтөрүү зарылдыгын айтты. Учурда өлкөдө кошумча нарк салыгы 12 пайызды түзөт.
Жер титирөөнүн эпицентри Муисне шаарынан түштүк-чыгыш тарабынан 28 чакырым алыстыкта жайгашкан. Зилзаладан көп кабаттуу имараттардын көбү, ресторан, мейманканалар урап түшкөн.
19-апрелде президент Алмазбек Атамбаев Эквадор президенти Рафаэль Висенте Корреа Дельгадого аталган өлкөдөгү зилзаланын курмандыктарына байланыштуу көңүл айткан.
