БИШКЕК, 21-апр. — Sputnik. Кечээ күнү Жогорку Кеңеште спикерликке шайлоо өтүп, ал кызматка аттанып жаткан Канат Исаев менен Бакыт Төрөбаев 51ден добуш алышты. Мыйзамга ылайык, кимиси 61 добуш алса төрага болуп шайланмак же бири экинчисинен көбүрөөк добуш алса экинчи турга чыкмак. Мындан улам шайлоо учурундагы эсептөө комиссиясы кайрадан жаңы талапкерлер менен жаңы шайлоо өткөрүү чечимине келди.
Бул көрүнүштөн чоң саясий айдыңда абал дагы эле кызуу бойдон, учурда төрага болчулардын айланасында талкуу күч. Анткен менен азырынча расмий талапкерлер көрсөтүлө элек.
Sputnik Кыргызстан агенттиги төрагалыкка кимдер аттанарына кызыгып көрдү.
"Биз таза шайлоо өткөрүп, үлгү боло алдык. "Өнүгүү-Прогресс" фракциясы ушул нерсени максат кылган. Эртең кайра шайлоо болсо да таза өтөрүнө ишенем. Ким келсе да шайлоо таза өтүүсү зарыл. Учурда көпчүлүк коалициясы жана оппозициялык маанайдагы фракциялар ичинде сүйлөшүүлөр жүрүүдө. Расмий маалымат айтыла элек. Бирок Чыныбай Турсунбеков, Иса Өмүркулов, Өмүрбек Текебаевдер көрсөтүлүшү мүмкүн. Парламенттен төрагалыкка татыктуу болчу мырзалар арбын", — дейт Төрөбаев.
Саясий серепчи Марс Сариев спикер болууга КСДП фракциясынын лидери Чыныбай Турсунбековдун реалдуу мүмкүнчүлүгү бар экенин белгилейт.
"КСДП фракциясы 2017-жылкы президенттик шайлоого даярданып жатат. Андыктан бул кызматка өзүнө керектүү адамды алып келет. Буга чейин эле Чыныбай Турсунбековдун аты аталып келген. Менимче анын реалдуу мүмкүнчүлүктөрү бар. Төрагалыкка Иса Өмүркулов келеби деп болжоп жаткам, акыркы күндөрү анын келбей турганы белгилүү болуп калды", — дейт Сариев.
Sputnik Кыргызстан агенттигинин журналистине атын атагысы келбеген эл өкүлү төрага Чыныбай Турсунбеков болушу мүмкүндүгүн билдирди.
"Буга чейин үч талапкердин аты айтылып келген. Алар Чыныбай Турсунбеков, Бакыт Төрөбаев жана Канат Исаев болчу. Экөөсү жарыштан четтеп кетти. Демек бир гана талапкер калды. Бул ким экенин силер жакшы түшүнүп турсаңар керек. Учурда ошол адамдын төрага болушу айтылууда", — дейт депутат.
"Азырынча биздин фракция кимдин талапкерлигин алып чыгууну тактай элек. Башка фракциялардын да сунушун угабыз. Парламенттин ичинде Чыныбай Турсунбеков, Иса Өмүркулов жана Каныбек Иманалиевдин болушу мүмкүндүгү айтылууда", — дейт эл өкүлү.
Ал ортодо Чыныбай Турсунбеков ага төрагалык кызматка сунуштар мурунтан айтылып келгенин Sputnik Кыргызстан маалымат агенттигине билдирди.
"Буга чейин эле спикерликке сунуштар түшүп келген. Кыргызда кеңешип кескен бармак оорубайт деген жакшы сөз бар. Биз бармагыбызды оорутуп албаш үчүн фракция ичинде кеңешме куруп, андан соң бир чечимге келебиз", — дейт Турсунбеков.
Эске сала кетсек, өткөн бейшемби күнү парламентте төраганы шайлоо маселеси күн тартибине киргизилип, бирок кворум болбой, спикерди шайлоо 20-апрелге белгиленген. Ал ортодо шайлоонун жыйынтыгы менен спикерликке аттанган Канат Исаев менен Бакыт Төрөбаев 51 добуштан алып, жарыштан четтеп калышты.
Ал эми буга чейинки төрага Асылбек Жээнбеков бир тууган агасы өкмөт башчылыкка көрсөтүлгөндөн кийин кызматынан баш тарткан.
