БИШКЕК, 24-апр. — Sputnik. Кыргызстандын акыйкатчысы Кубат Оторбаев БУУ комитетинин Азимжан Аскаровду бошотуу боюнча чечими анын ишин кайра карап чыгууга негиз болуусу керектигин жар салды. Бул тууралуу акыйкатчынын маалымат кызматы билдирет.
Акыйкатчы Кыргызстан Атуулдук жана саясий укуктар жөнүндө Эл аралык пактыга мүчө болуп киргенин, андыктан аталган нормада каралган адам укуктары жана эркиндиктери сакталышы керектигин айтат. Ал эми бул нормаларды БУУнун адам укуктары боюнча комитети көзөлгө аларын кошумчалайт.
"Конституциянын алтынчы беренесине ылайык, Кыргызстан эл аралык келишимдерге киргенден кийин андагы эрежелерди сактоосу керек. Мындан сырткары, баш мыйзамдагы 41-беренеге ылайык, эгерде Кыргызстанда адам укугу бузулса, анда ал эл аралык укук коргоочу уюмдарга кайрыла алат. Эгерде эл аралык укук коргоочу уюмдар кайрылган адамдын укугу бузулганын тааныса, Кыргызстан бузулган укукту калыбына келтирүүсү керек", — дейт акыйкатчы.
Оторбаев КРдин Кылмыш жаза процессуалдык кодексинин 384-беренесине ылайык, эгерде эл аралык уюмдар тарабынан адам укугу бузулганы аныкталса, кылмыш ишин кайрадан карап чыгууга түрткү болорун кошумчалайт.
"Жогорудагы нормаларга ылайык БУУнун Азимжан Аскаров боюнча доклады анын ишин кайрадан карап чыгууга негиз болуусу керек. Бирок, ошол эле учурда БУУнун чечими Аскаров күнөөлүү эмес дегенди түшүндүрбөйт", — дейт Оторбаев.
Июль айында (2015-жылы) АКШнын мамлекеттик департаменти тарабынан Азимжан Аскаровго "Адам укугунун коргоочусу" сыйлыгынын ыйгарылышы Кыргызстанда нааразычылыкты жараткан.
Ага жооп иретинде Кыргызстан АКШ менен 1993-жылдын 19-майында кол коюлган кɵмɵк кɵрсɵтүүнү жеңилдетүү боюнча кызматташуу келишимин бир тараптуу жокко чыгарган.
