БИШКЕК, 25-апр. — Sputnik. Борбор калаанын күнү — 29-апрелде Бишкек шаарында жамгыр жаашы мүмкүн. Бул тууралуу Кыргызгидрометтен Sputnik Кыргызстан маалымат агенттигине билдирди.
Маалыматка ылайык, 29-апрелде түштөн кийин жамгыр жаашы мүмкүн. Абанын температурасы күндүз 23…25 градуска чейин жылуу болот.
30-апрелде нөшөрлөп жаан төгүп, абанын температурасы кескин төмөндөп, күндүз 14…16 градус жылуу болсо, түнкүсүн 10…11 градуска түшөт.
Ал эми 1-майда ала булут каптаганы менен, күн жылуу болот.
Шаар күнүнө карата 29-апрелде жаңы алынып келген автобустар №42 маршрут боюнча 12-кичирайондон Ала-Тоо конушуна чейин линияга чыгат. Ошондой эле калаадагы фонтандар да иштеп баштайт.
Шаардык кеңештин токтомуна ылайык, 29-апрель — борбор калаанын күнү деп белгиленген. Быйыл Бишкек 138 жылдыгын майрамдайт.
