Голливуд Кыргызстанга кызыгууда

БИШКЕК, 25-апр. — Sputnik. Америкалык режиссерлор Кино жаатындагы Эл аралык ассоциациянын Локация шоусунда Кыргызстандын көргөзмөсүн чоң кызыгуу жараткан. 

Бул туурасында Дүйнөлүк көчмөндөр оюндарынын катчылыгы билдирди.

Локациялар шоусу — кино тартуу үчүн көпчүлүккө белгисиз аймак-жерлерди издеп жүргөн продюсерлердин башын бириктирүүчү ири эл аралык иш-чара.

Аталган шоу 21-23-апрель күндөрү Лос-Анжелес шаарында өткөн. Кыргызстандын жана Дүйнөлүк көчмөндөр оюндарынын расмий өкүлү катары иш-чарага "Кино жана телекөрсөтүү боюнча кыргыз-орус көз карандысыз комитет" уюму катышты.

Катчылык иш-чарада Кыргызстандын стенди эң кооз деп табылганын белгилейт. Көргөзмөнүн алгачкы күнүндө эле атайы комитет "Мыкты брендинг" категориясында дүйнөнүн булуң-бурчунан келген 70 атаандаштын ичинен биринчи орунду Кыргызстанга ыйгарган. 

"Иш-чарада америкалык продюсерлер Кыргызстандын жерине абдан кызыгып, биздин аймакта кино тартууга даяр экендиктерин билдиришти", — деп айтылат билдирүүдө.

Маалыматта Кыргызстанды кинокомпаниялар менен телеканалдарды тарткан бир нече фактор бар экени айтылат. Алардын ичинде инфраструктуранын өнүгүшү, аймактагы адистер, анан эң башкысы — көрөрмандын басымдуу бөлүгү үчүн Кыргызстан белгисиз өлкө экени артыкчылык берет. 

Иш-чара уланган үч күндүн ичинде Кыргызстандын өкүлдөрү республикада кино тартуу үчүн 200дөн ашуун продюсер менен сүйлөшүүлөрдү жүргүзгөн.