БИШКЕК, 27-апр. — Sputnik. Көпчүлүк коалициянын лидери Чыныбай Турсунбеков Жогорку Кеңештин төрагасы болуп шайланды.
Турсунбековду спикерликке "КСДП" фракциясы алып чыгып, "РАЖ", "Ата-Мекен" фракциялары колдогон.
Ал эми "Өнүгүү-Прогресс" фракциясы Исхак Масалиевдин талапкерлигин көрсөткөн.
Эсептөө комиссиясынын төрагасы Мирлан Жээнчороев бардыгы болуп 120 бюллетень даярдалганын билдирди.
"Чыныбай Турсунбеков — 88, ал эми Исхак Масалиев — 26 добушка ээ болду. Үч депутат баарына каршы болгон, дагы үч бюллетень жараксыз болуп чыккан", — деди Жээнчороев.
Эскерте кетсек, буга чейин спикерликке талапкерлигин койгон Канат Исаев менен Бакыт Төрөбаев шайлоодо 51ден добуш алып, жарыштан четтеп калган.
