БИШКЕК, 27-апр. — Sputnik. КСДП фракциясынын лидери ким болору биринчи отурумда каралат. Бул тууралу Sputnik Кыргызстан агенттигине депутат Иса Өмүркулов билдирди.
Эскерте кетсек, КСДП фракциясынын жана көпчүлүк коалициясынын мурунку лидери Чыныбай Турсунбеков төрага болуп шайлангандыктан аталган орундар бош калган.
Ал эми саясий серепчилер фракция лидерлигине Иса Өмүркуловдун келишин болжошкон.
"Биздин башкы максат төраганы шайлоо болчу. Аман-эсен шайлап алдык. Фракциянын биринчи эле жыйынында лидер ким болору каралат", — дейт Өмүркулов.
Ал лидерликтин сунушталышы боюнча суроону жоопсуз калтырды.
"Бул сурооңузга жооп бербей эле турайынчы", — деди депутат.
Ал көпчүлүк коалициясынын лидери да жакынкы күнү тандаларын кошумчалады.
