БИШКЕК, 27-апр. — Sputnik. Өлкө аймагында "Өспүрүм-түн" аталышындагы рейд өтүп, ата-энеси жок жүргөн балдар текшерилүүдө. Бул тууралуу ИИМдин маалымат кызматы билдирди.
Ага ылайык, рейд 26-27-апрель күндөрү республиканын бардык жерлеринде жүрөт. Бул иш-чарага ички иштер бөлүмүндө иштеген 4094 кызматкер тартылган. Ошондой эле балдар иштери боюнча комиссиянын, билим берүү мекемелеринин өкүлдөрү да катышууда.
26-апрелде соода борборлору, көңүл ачуучу жайлар, түнкү клубдар, интернет кафелер, аэропорт жана автовокзалдар текшерилген. Анын жыйынтыгында түндө ата-энеси жок жүргөн 28 жашы жете элек бала кармалган.
Балдарды жана үй-бүлөнү коргоо боюнча органдар тарабынан ата-энелерге карата 21 протокол түзүлдү.
Иш-чаранын маалында өспүрүмдөргө кылмыштуулуктун алдын алуу боюнча түшүндүрүү иштери жүргүзүлгөн. Түндө кармалган 28 жашы жете элек балдардын ата-энелерине кат жөнөтүлөт.
