БИШКЕК, 28-апр. — Sputnik. Казакстандык Вазген Заргарьян "Ислам мамлекети" террордук тобуна кошулууга аракет кылгандыгы үчүн Ростов-на-Дону шаарында соттолду. Бул тууралуу Түндүк-Кавказ аймактык аскердик сотунун сайтында кабарланды.
Буга чейин жалпыга маалымдоо каражаттары Ростов-на–Дону аймагында кыргызстандык жаран соттолгонун жазып чыгышкан. Соттун маалымат катчысы Алена Катькало соттолгон адам кыргызстандык эмес, казакстандык экенин тастыктады.
"1992-жылдын 19-ноябрында төрөлгөн Вазген Заргарьян Казакстандын жараны", — деди өкүл.
Заргарьяндын иши боюнча соттук отурум 28-апрель күнү болду. Анда соттолуучу күнөөсүн мойнуна алып, 2 жыл 6 айга эркинен ажыратылды.
Ал Россиянын Кылмыш жаза кодексинин 205,208-беренелери боюнча жазага тартылды. Буга чейин тергөө амалдары Заргарьяндын "Ислам мамлекети" террордук тобуна кошулуу үчүн Сирияга кетүүгө аракет кылганын далилдеген.
