БИШКЕК, 29-апр. — Sputnik. Өлкө башчысы Алмазбек Атамбаев "Сүтак" көркөм тасмасынын режиссеру Мирлан Абдыкалыков менен продюсери Садык Шер-Ниязды кабыл алганын президенттин маалымат кызматы билдирди.
Март айында аталган тасма Балтика жана КМШ мамлекеттеринин эң мыкты тасмасы деп таанылып, "Ника" сыйлыгына татыган.
Атамбаев тасманын авторлорун эл аралык бир катар абройлуу сынактарда ийгиликтерге багынтканы менен куттуктап, кинону жараткан чыгармачыл топко кыргыз элинин меймандостугу, салт-санаасы жөнүндө жакшы тасма тартканы үчүн ыраазычылык айтты.
"Силер улуу тоолор арасында көчүп-конуп жашаган кыргыз үй-бүлөсүнүн татаал тагдырын жана турмуш-тиричилигин, алардын каарман эмгегин, жаратылышка болгон сүйүүсүн жана аяр мамилесин, биздин бай каада-салттарыбызды жакшы көрсөтө алгансыңар", — деди өлкө башчы.
Ошондой эле Абдыкалыковго кол саат тапшырып, чыгармачылык ийгилик каалады.
"Сүтак" — адамдардын ортосундагы таза мамилелер, аруу сезимдер, ыйык каада-салт тууралуу тасма.
"Айтыш-фильм" тарабынан "Ой Арт" студиясы менен биргеликте тартылган тасма бир катар эл аралык кинофестивалдардын баш байгесин багындырган.
