БИШКЕК, 1-май. — Sputnik. Кыргызстанга иш сапар менен 30-апрель күнү келген Тажикстандын тышкы иштер министри Сирождин Асловду КР ТИМ башчысы Эрлан Абдылдаев кабыл алды. Бул тууралуу аталган мекеме билдирди.
Маалыматка ылайык, тараптар кыргыз-тажик тараптар ортосундагы ар кыл тармактагы, өзгөчө аймактык коопсуздук жана чек ара жаатындагы кызматташуусун талкуулады. Муну менен бирге эки өлкөнүн саясий, соода-экономикалык, суу-энергетикалык, транспорт-коммуникациялык, маданий-гуманитардык өз ара мамилеге өзгөчө басым жасалды.
Министрлер Кыргызстан менен Тажикстандын учурдагы байланышы кызматташууну өнүктүрүүгө түрткү болорун белгилешти.
Буга чейин Тажикстандын ТИМ башчысын президент Алмазбек Атамбаев да кабыл алган.
