Ош, 5-май — Sputnik. Ош шаарындагы болочок ата-энелер мектебинин ишмердүүлүгү менен БУУнун өкүлдөрү таанышты.
Үй-бүлөлүк медицина борборунун алдындагы мектептин инструктору Чынара Казакбаева келген конокторго мектептин негизги максаты болочок ата-энелерди балалуу болууга даярдоо экенин билдирди.
"Бул жерде төрөт маалында атанын ролу тууралуу маалыматтар берилет. Ал эми тун баласын көргөн энеге ымыркайды туура багуу жолдору үйрөтүлөт", — деди Казакбаева.
Ал белгилегендей жаш ата-энелердин бала багуу тажрыйбасы жок болгондуктан, алдын ала окутуу мектептеринин болушу маанилүү.
"Учурда республика боюнча ар бир саламаттык сактоо уюмдары менен поликлиникаларда ушундай мектептер ачылып жатат", — деп кошумчалайт инструктор.
Белгилей кетсек, БУУнун аткаруучу кеңешинин делегациясы Кыргызстанга биринчи жолу келди. Алардын курамына өзгөчө жана толук ыйгарымдуу элчилер, 18 мамлекетте иштеген ага дипломаттар кирген.
