БИШКЕК, 9-май — Sputnik. Кыргызстандын премьер-министри Сооронбай Жээнбеков кыргызстандыктарды Улуу Ата Мекендик согуштагы Жеңиштин 71 жылдыгы менен куттуктады.
Өкмөт башчы өз сөзүндө Кыргызстандын эли согуш талааларында өмүрүн Жеңишке арнаган уулдары жана кыздары менен сыймыктана тургандыгын белгиледи.
"Оорукта күн-түн дебей, ысык-суукта өз жанын аябаган он миңдеген кыргызстандыктардын эмгеги Ата Мекенге кызмат кылуунун үлгүсү болуп түбөлүк калат", — деп билдирет Жээнбеков.
Ал билдиргендей Улуу Ата Мекендик согуштун жана ооруктун ардагерлери баатырларыбыздын өлбөс-өчпөс эрдигин унуттурбай, жаштарды эрдикке шыктандырып, мекенчилдик сезимдерин ойготуп келет.
"Урматтуу ардагерлер! Ар-бириңиздерге бекем ден-соолук, бакубат жашоо, аманчылык каалайм! Кан-жаныңарды аябай, сактап калган тынчтык үчүн, Улуу Жеңиш үчүн сиздерге баш ийип, таазим кылабыз”, — деди Жээнбеков.
Премьер-министр ардагерлерди урмат-сыйга бөлөп, ар тараптан камкордук көрүү ар бир жарандын ыйык милдети экенин кошумчалады.
