Прокурор: Нарымбаев күнөөлүү, Коркмазов кылмышты ачууга жардам берди

БИШКЕК, 23-май — Sputnik. Бүгүн, 23-майда Бишкек шаардык сотунда президенттик аппараттын мурдагы жетекчиси Данияр Нарымбаев менен Жогорку Кеңештин экс-депутаты Хажимурат Коркмазовдун иши боюнча сот отуруму уланып, тараптар акыркы сөзүн сүйлөштү.

Биринчи болуп мамлекеттик айыптоочу сөз алды. Ал Нарымбаев баюу максатында Назгүл Түлеевадан акча талап кылганын, Чыныбай Турсунбековду кепке тартып, Түлеевдин конфискацияланган мүлкүн бошотууга аракет жасаганын айтты.

"Муну Нарымбаевдин Нариман Түлеевдин иниси менен жолуканы тастыктап турат. Нарымбаев мүлктү бошотуу боюнча абалды жакшы жака чечүүгө аракет кылган. Ал Назгүл Түлеева менен 6-май күнү 2015-жылы телефон аркылуу сүйлөшүп, 7-майда Ак үйдөн жолугууга макулдашкан. Нарымбаев Түлееванын келерин билип, Нариман Түлеевдин жакын санаалашы, мурунку депутат Коркмазовду чакырган. Ал жерде экөө Назгүл Түлеевадан акча алууну сүйлөшүшкөн. Эртеси, 2015-жылдын 8-май күнү Нарымбаев кызматтык телефону аркылуу Коркмазов менен байланышып, Түлееваны кабыл алганын айткан. Андан соң Нариман уулу Бакыт эжеси Назгүлдүн тапшырмасы менен Ак үйгө 50 миң доллар алып келип берген. Өз кезегинде Назгүл Түлеева 50 миң долларды Коркмазовго берген. Ал эми Коркмазов ал акчаны Нарымбаевге тапшырган", — деди прокурор. 

Ал Нарымбаев акча алгандан кийин Жогорку соттун ишине кийлигише баштаганын кошумчалады.

"Нарымбаев Жогорку соттун судьясы Турганбековго чалып, Түлееваны кабыл алуусун суранган. Бирок маселе оң жагына чечилген эмес. Абалды көргөн Түлеева маселе чечилбей жатканына нааразы болгон. Кийинчерээк Нарымбаев Түлеевадан дагы 200 миң доллар талап кылган. Ыза болгон Түлеева ыктыярдуу түрдө УКМКга келип, акча талап кылып жатканы боюнча арыз жазган. Андан соң сүйлөшүүлөр жүрүп, 2015-жылдын 15-июнь күнү Коркмазов Түлеевадан акча алып жаткан жеринде колго түшкөн. Ал каражатты Нарымбаевге берүү үчүн алганын айткан. Коюлган айыптар бардык документтер менен далилденип, толук кандуу бардык суроолорго жооп алдык. Жогорудагыларды эске алып, Данияр Нарымбаевди күнөөлүү деп таап, коюлган айыптар боюнча жазага тартууну өтүнөбүз", — деди мамлекеттик айыптоочу.

Экинчи мамлекеттик айыптоочу Нурлан Сулайманкулов Хажимурат Коркмазовго карата жазаны өзгөртүүнү суранды.

"Коркмазов акчаны алууга гана көмөктөшкөн. Ал акчаны өзү алган эмес. Мындан сырткары, Коркмазов жарандык милдетин аткарып, коррупцияны ачууга көмөктөшкөн. Андыктан Коркмазовко карата жазаны өзгөртүүнү өтүнөбүз", — деди прокурор.

Андан соң Коркмазовдун адвокаты Кайрат Загибаев айыптоочунун сөзүн толугу менен колдоого алды.

Кийинки кезек Нарымбаевдин адвокаты Михаил Зауманга жетип, ал жөн жерден күнөө коюлуп жатканын белгиледи.

"Биз Биринчи Май райондук сотунун чечимне макул эмеспиз. Кызматынан кыянаттык менен пайдалануу күнөөсү коюлган. Бирок коюлган күнөөлөр далилденген жок", — деди адвокат. 

Эскерте кетсек, Биринчи Май райондук соту президент администрациянын мурунку жетекчиси Данияр Нарымбаевди үч жылга, ал эми Хажимурат Коркмазовду 1,5 жылга эркинен ажыратуу өкүмүн чыгарган. Аталган чечим боюнча айыпкерлер Бишкек шаардык сотуна аппеляциялык арыз жазган. Июль айынын ортосунда УКМКнын коррупцияга каршы күрөшүү кызматы Коркмазовдун 100 миң доллар пара алып жаткан жеринен кармаган. Ал акчаны экс-депутат Нариман Түлеевдин туугандарынан Жогорку сотто карала турган ишин оң жакка чечүүгө жардам берем деп алган. Башкы прокуратура Коркмазовдун 200 миң доллар талап кылганын маалымдаган. 

Экс-депутат акчаны президент аппаратынын жетекчиси Нарымбаевдин айтканы менен талап кылганы боюнча көрсөтмө берген. Июлдун аягында Нарымбаев да камакка алынган. Кармалгандар соттун чечими менен УКМКНын тергөө абагында кармалып келишкен.

Нариман Түлеев эки ирет колдонулган мунапыстын негизинде үcтүбүздөгү жылдын 7-май күнү абактан чыккан.