Оштогу нөшөрлөгөн жамгырдан улам үй-жайлар менен имараттар сууга толуп калды

ОШ, 23-май — Sputnik. Ош шаарынын борбордук көчөлөрүн нөшөрлөгөн жамгырдан кийин кыян суу каптап кетти.

Нөшөр шаардык каналдарды нугунан чыгарып, суу жолдор менен тротуарларга толуп калды. Кыян суудан улам, көчө боюнда жайгашкан дүкөндөрдүн эшигин ээлери мүшөктөр менен тосуп, агымды ал жакка киргизбегенге аракет кылышты.

Алдын ала алынган маалыматтарда, борбордук — Курманжан датка, Ленин, Гапар Айтиев атындагы көчөлөрдү суу каптады. 

ӨКМдин билдирген маалыматына таянсак, шаардык соттун имараты жабыркап, жер төлөсүнө суу толуп калды. Андан сырткары куткаруучуларга дагы бир топ объектилерди суу каптаганы боюнча кабарлар түштү.

Аталган министрликтин маалымат кызматы кечки саат 18.00 чамасында Араван, Курманжан датка, Курчатов, Калинин көчөлөрүндөгү, "Түштүк-Чыгыш" жана "Ак-Тилек" кичи райондордогу арыктардан суу ашып кеткендигин кабарлады.

Бул аймактардагы турак үйлөр жана бир катар короо-жайларды суу каптап, чакыруу менен келген куткаруучулар толуп сууну сордуруп, тазалап жатат.