БИШКЕК, 24-май — Sputnik. Жогорку Кеңештеги "Ата Мекен" фракциясынын лидери Өмүрбек Текебаев президент Алмазбек Атамбаевге кримтөбөл Азиз Батукаевди бошотуу боюнча чечим чыгарган сот Жапар Эрматовду Нарын облусунун райондор аралык сотунун жетекчилигине дайындалышына каршылык билдирген кат жөнөттү.
Ошондой эле депутат КРдин сотторду тандоо боюнча кеңеши райондор аралык сотунун судьялыгына конкурс жарыялап, анда Эрматов эң жогорку упай алганын айтат. Бирок "Соттордун статусу жөнүндө" мыйзамга ылайык, алар кызмат ордун ишинен мүчүлүштүк кеткенге чейин сактап турат деп жазылган.
Ошол эле учурда Текебаев Жогорку Кеңештин комитети сот Эрматовдун Батукаевди бошотуу боюнча чыгарган чечимин мыйзамсыз деп тапканын белгилейт.
"Кримтөбөл Азиз Батукаевдин мөөнөтүнөн мурда бошотулушу коомдо чоң талаш-тартыш жараткан. Депутаттык комиссия өз чечиминде Эрматов Батукаевди чыгаруу боюнча өкүм чыгарып жатканда мыйзамды көзгө илген эмес деп белгилеген", — деп айтылат катта.
Белгилей кетсек, Азиз Батукаев 2006-жылы 3-августта Аламүдүн райондук сотунун чечими менен катуу режимдеги колонияга 16 жыл 18 айга кесилген. Бирок 2013-жылы 9-апрелде соттун чечими менен бошотулуп, ошол эле күнү Кыргызстандан чыгып кеткен. Учурда ал Россияда.
