БИШКЕК, 25-май — Sputnik. Алмазбек Атамбаев, Сооронбай Жээнбеков, Чыныбай Турсунбеков баштаган мамлекет жетекчилери белгилүү жазуучу, сценарист жана драматург Талип Ибраимовдун жакындарына көңүл айтты. Бул тууралуу өкмөттүн маалымат кызматы билдирди.
Белгилей кетсек, КР маданиятына эмгек сиңирген ишмер, "Даңк" медалынын ээси, коомдук жана мамлекеттик ишмер Талип Ибраимов 76 жаш курагында узакка созулган оорудан көз жумган.
"Эч нерседен тайманбаган курч мүнөзү, мекенин өз жанындай көргөн патриоттуулугу, адилеттүүлүгү, адамдык бийик сапаты, жөнөкөйлүүлүгү жана мыкты уюштуруучулук жөндөмү менен өзгөчөлөнүп турган. Ибраимовдун жаркын элеси, журтубуздун, чыгармачыл интелигенциянын жана жакындарынын арасында түбөлүккө сакталат", — деп айтылат билдирүүдө.
Талип Ибраимов "Старик и Ангел" аңгемелер жана повестер топтому үчүн Эл аралык "Русская премия" адабий конкурсунун "Малая проза" номинациясында жеңүүчү, лауреат болгон.
Жазуучуну акыркы сапарга узатуу зыйнаты 27-майында саат 10:00 до Бишкек шаарында, Төлөмүш Океев атындагы "Улуттук Кыргыз фильм" киностудиясында өтөт. Маркумдун сөөгү Бишкек шаарынын Түштүк-Батыш көрүстөнүнө коюлат.
