БИШКЕК, 28-май — Sputnik. Ош шаарында жергиликтүү жана чет элдик жазуучулардын кыргыз тилиндеги сейрек кездешүүчү чыгармалары орун алган "Кыргыз китеп" аттуу ресурстук борбор ачылды. Бул тууралуу китепканалар ассоциациясынын президенти Жылдыз Бакашова билдирди.
Анын айтымында, аталган борбор Токтогул Сатылганов атындагы Ош облустук китепканасынын базасында республикалык китепканалар форуму учурунда ачылган.
Борбордо кыргызстандык жазуучулардын чыгармалары, классикалык адабияттын кеңири фондусу жана кыргыз тилине которулган чет элдик жазуучулардын эмгегин табууга болот.
"Кыргыз китеп" борборунун ачылышы мамлекеттик тилди өнүктүрүүгө чоң салым болуп саналат. Адабият сүйүүчүлөр бул жерден жергиликтүү жана чет элдик авторлордун сейрек кездешүүчү чыгармаларын таап, алар менен жакындан тааныша алат", — деди борбордун директору Талант Ормушев.
Бакашованын айтымында, аталган форум жыл сайын буга чейин Бишкек шаарында өтүп келген, ал эми быйыл иш-чараны аймакты өнүктүрүү жана кырдаал менен жеринен таанышуу үчүн Ош шаарында өткөрүү чечими кабыл алынган.
