БИШКЕК, 30 мая — Sputnik. Мамлекеттик каттоо кызматы (МКК) үстүбүздөгү жылдын 1-сентябрынан тарта 1994-жылдагы эски үлгүдөгү паспортторду жараксыз деп таануу боюнча токтом даярдоодо. Бул тууралуу МКК билдирди.
Бул демилге күзүндө жергиликтүү кеңештерге боло турган шайлоого байланыштуу көтөрүлүүдө.
Үстүбүздөгү жылдын 27-мартында өткөн шайлоодо 500дөн ашык жаран эски үлгүдөгү паспортунун айынан добуш берүүгө киргизилген эмес.
МККнын билдиришинче ушу тапта Кыргызстанда 10 миңге чукул жаран 1994-жылкы паспорт колдонуп жүрөт. Эски үлгүдөгү паспорттор Эл аралык жарандык авиациянын стандартына ылайык, 2015-жылдын 24-ноябрынан тарта учууга жараксыз деп табылган.
Паспортторун акысыз алмаштыруу үчүн жарандар катталган жери боюнча паспорт столдоруна кайрылса болот.
