БИШКЕК, 17-июн. — Sputnik. Борбор калаа Бишкек шаарынын четинде окуучуларды көчмөн турмушка жетелеген жайкы лагерь түзүлгөнүн аны уюштурган Мелис Мураталиев Sputnik Кыргызстан агенттигине билдирди.
Анын айтымында, балдар үчүн мындай жайкы лагерь эки жылдан бери иштеп уюштурулуп келет. Ага 10-14 жашка чейинки жеткинчектер кабыл алынат.
"Лагерь өсүп келе жаткан жаш муунга көчмөн маданиятын жакындан таанытууну көздөйт. Себеби, борбор шаардын окуучулары көбүн эсе компьютер, планшеттен башы чыкпай, кыймылдуу оюндарга аз катышып муун-жүүнү бош болуп башкача өсүп жатат", — дейт ал.
Мураталиев лагерге келген балдар эртеден кечке чейин кыргыздын тамак-ашынан тарта, баатырлардын эрдиги жана чүкө менен ойнолчу түрдүү оюндарды үйрөнөрүн баса белгиледи.
"Балдарга кыргыздын буюмдары, тамактары буга чейин кантип жасалып келгенин түшүндүрүп, аны көрсөтүп беребиз. Мисалы чопо чоор кантип жасаларын көрсөтөбүз. Ал үчүн чопону алып келип ийлеп, тешиктери кантип көзөлө турганына чейин көрсөтүп беребиз. Андан сырткары, балдарга камчы өрүүнү көрсөтсөк, кыздарга кийизден түрдүү буюмдарды жасоону көрсөтөбүз", — деди ал.
Балдар лагерде эртеден кечке чейин болуп, кечинде үйлөрүнө кайтышат.
