БИШКЕК, 23-июн.— Sputnik. Президент Алмазбек Атамбаев бүгүн, 23-июнда иш сапар менен Өзбекстанга жөнөп кетти. Бул тууралуу мамлекет башчынын маалымат кызматы кабарлады.
Иш сапар маалында Атамбаев Шанхай кызматташтык уюмуна (ШКУ) мүчө мамлекет башчыларынын кеңешинин кезектеги жыйынына катышат.
ШКУнун жыйыны 23-24-июнга белгиленген. Кезектеги бул саммитке Индия менен Пакистанды кабыл алуу пландалган.
ШКУга учурда Кыргызстан, Россия, Кытай, Казакстан, Тажикстан жана Өзбекстан мүчө. Ал эми Белоруссия, Монголия, Индия, Иран, Пакистан жана Афганистан байкоочулук статусу менен катышып келет. 2015-жылдын июнь айында ШКУга Индия менен Пакистанды мүчөлүккө алуу иштери башталган. Уфа шаарындагы жыйында аталган уюмга төрагалык кылуу милдети Россиядан Өзбекстанга өткөн.
