Тяньцзинь шаарынын мэри Кыргызстанда өскөн мөмө-жемиштин даамына суктанды

ТЯНЬЦЗИНЬ, 28-июн. — Sputnik. Кытайдын Тяньцзинь шаары Кыргызстандын айыл-чарба продукцияларына кызыгууда. Мындай пикирин аталган шаардын мэри Хуан Сингуо КР премьер-министри Сооронбай Жээнбеков менен жолукканда билдирди. 

Белгилей кетсек, ушул күндөрү өкмөт башчы Жээнбеков баштаган кыргыз делегациясы Кытайдын Тяньцзинь шаарында өтүп жаткан "Жайкы Давос 2016" дүйнөлүк экономикалык форумга катышты. Кыргыз делегациясы КЭРдин премьер министри Ли Кэцяндын чакыруусу менен келген. 

Шаар башчысы Хуан Сингуо Жээнбековго Тяньцзиндин кызмат көрсөтүү, маалыматтык технология, фармацевтика жана автоунаа чыгаруу боюнча мүмкүнчүлүктөрү тууралуу айтып берди. Мэр Кыргызстандын айыл-чарба продукцияларына кызыгып, Кыргызстан менен Кытайдын ортосундагы достукту чыңдоого дилгирлигин билдирди.

"Кыргызстандын айыл чарба азыктарынын сапаты абдан жакшы, өзгөчө силерде өскөн гиластын даамы абдан таттуу экенин билебиз. Андыктан айыл чарба продукциясын алууга кызыкдарбыз", — деди Хуан Сингуо.

Өз кезегинде Жээнбеков кыргыз делегациясын жылуу кабыл алганы үчүн мэрге ыраазычылык билдирип, эки элдин ортосундагы кызматташуунун маанисин баса белгиледи. Ошондой эле Кыргызстан Кытай тараптын бардык демилгелерин колдой турганын, алардын да колдоосун сезип жатканына токтолду. 

Өкмөт башчы андан сырткары Тяньцзинь менен Бишкек шаарынын ортосунда байланышты чыңдоого кыргыз тарап даяр экенин айтты.