БИШКЕК, 29-июн. — Sputnik. АКШ соту атактуу Happy Birthday To You (Туулган күнүң менен) ырын элдик чыгарма деп тапты. Бул тууралуу РИА Новости CBS News телеканалына таянуу менен жазып чыкты.
Маалыматка ылайык, федералдык сот Жордж Кинг дүйшөмбү күнү чечим чыгарып, ага ылайык Warner/Chappell Music компаниясы аталган ырга авторлук укугунан ажырады. Мындан улам буга чейин ырды акча төлөп колдонуп келгендердин 14 миллион долларын кайрып бермей болду.
"Автордук укук чыгармачыл инсандар үчүн өтө маанилүү. Бирок бардык нерсенин чеги болушу керек. Сот тарыхый чечим кабыл алды", — деди адвокат Дэниэл Шахт.
Атактуу Happy Birthday to You ыры дүйнөнүн төрт бурчуна тараган ыр. Аны улутуна, өлкөсүнө карабай туулган күндөрдө ырдап келишет.
