БИШКЕК, 29-июн. — Sputnik. Чүй облусундагы Аламүдүн районунун прокурору Кубанычбек Мамакеевди Биринчи Май райондук соту пара талап кылганы үчүн 12 жылга кести. Бул туурасында Жогорку Соттун маалымат кызматы билдирди.
Прокурорду орун басары жана жардамчысы менен былтыр август айында 2 миң доллар алып жаткан учурунда кармашкан. Алты миң доллардын бөлүгү буга чейин прокурордун жардамчысы аркылуу алынгандыгы жана бул ишке анын орун басарынын катыштыгы бар деген маалыматтар айтылган.
Мамакеевдин үй-мүлкү конфискацияланып, өзү 12 жыл күчөтүлгөн тартипте жаза өтөмөй болду. Аны жаза мөөнөтү былтыркы жылдын 25-августунан тарта эсептелмекчи.
Прокурордун жардамчысы Улукбек Жумабековдун бул кылмышка тиешеси бар деп чечилип, ал мамлекетке беш миллион сом суммадагы айыппул төлөп бермей болду.
Прокурордун жардамчысы Марат Дөнөнбаев бул иште күнөөлүү деп табылып, 4 миллион сомдук айыпка жыгылды. Анын каражаты да мамлекеттик кирешелерге чегерилмей болду.
Күнөөлөнгөн адам соттун бул чечимине макул болбосо 10 күндүн ичинде Бишкек шаардык сотуна арызданууга укугу бар.
