БИШКЕК, 9-июл. — Sputnik. Илимдер академиясында улуу жазуучусу Чыңгыз Айтматовдун чыгармаларын жана өмүр жолунун урунттуу учурларын камтыган энциклопедиянын долбоорун даярдоо маселеси талкууланды. Бул тууралуу аталган академия кабарлады.
Талкууга Айтматовдун чыгармачылыгы менен өмүр жолун изилдеп жүргөн окумуштуулар, журналисттер, адабиятчылар жана коомчулуктун өкүлдөрү катышты.
Академик Абдылдажан Акматалиев Айтматовдун чыгармаларынан энциклопедиясы жазуучунун ата-теги, үй-бүлөсүнө арналган материалдарды, анын чыгармалары жөнүндө конкреттүү анализдер, публицистикалык материалдары камтылышы керектигин айтты. Андан сырткары, Айтматовдун маектери, чыгармаларындагы каармандардын прототиптери, эмгектерин баскан басылмалар, чыгармаларындагы адам аттары, мектеп программасындагы орду, Айтматовдун сүрөт искусствосундагы орду сыяктуу темаларды да четте калбашы белгиленди.
Акматалиевдин айтымында, бул тематикалар сунуш-пикирлерге жараша өзгөрүшү толук мүмкүн.
Жыйында энциклопедия 10 томдук болуп чыгаары, аны чыгарууга демөөрчү издөө керектиги айтылып, чет өлкөлөрдүн Кыргызстандагы элчиликтерине өтүнүч каттар жөнөтүлгөнү кабарланды.
