БИШКЕК, 9-июл. — Sputnik. Президент Алмазбек Атамбаев бүгүн, 9-июлда өлкөнүн ички иштер министри Кашкар Жунушалиевди кабыл алганын өлкө башчынын маалымат кызматы билдирди.
Жолугушууда Атамбаев коомдук коопсуздукту жана укук тартибин камсыз кылуу, ошондой эле кылмыштуулукка каршы күрөштү жигердештирүү боюнча аткарылып жаткан иштер тууралуу ведомство жетекчисинин маалыматын укту.
Жунушалиев ички иштер органдарынын бөлүктөрү өлкөдө өтүүчү ири эл аралык иш-чаралар учурунда коомдук коопсуздукту камсыз кылууга кандай даярдыктарды көрүп жатканын айтып, ошондой эле туристтик сезон мезгилинде коомдук тартипти сактоо боюнча көрүлүп жаткан чаралар жөнүндө да баяндап берди.
Андан тышкары, ички иштер министри милиция кызматкерлери үчүн турак жайларды куруу боюнча алдыдагы пландар жөнүндө да маалымат берди.
Президент өлкөдө укук тартибин камсыз кылуу үчүн ички иштер органдарынын ишмердигинин натыйжалуулугун арттыруу жана жарандардын милицияга болгон ишенимин жогорулатуу боюнча чараларды активдештирүүнүн зарылдыгын белгиледи.
