БИШКЕК, 14-июл. — Sputnik. Мамлекеттик кадр кызматы мамлекет жетекчилери менен Жогорку Кеңештин депутаттарынын 2015-жылдагы декларациясын жарыялады.
Sputnik Кыргызстан агенттиги Жогорку Кеңештин кайсыл депутаттары "жерден башын албай иштегенин" жана канча үлүш жери бар экенине кызыгып көрдү. Эл өкүлдөрү ээлик кылган жерлердин рейтингин алардын жалпы аянтына карап чыгарып көрсөттүк.
"Кыргызстан" фракциясынын депутаты Нурланбек Макеев ээлик кылган жердин аянты 274,3 гектарды түзөт. Бул аймакка көп жылдык көчөттөр жана дыйкан чарбасы жайгашкан. Тапшырган декларациясына ылайык, депутаттын жерден башка эч нерсеси жок. Эл өкүлүнүн жакындарынын 80,2 чарчы метрлик үйү, 177,1 чарчы метрлик коттеджи бар.
"Республика — Ата-Журт" фракциясынын депутаты Кенжебек Бокоев 28,1 гектар жери менен биздин рейтингде экинчи орунду ээледи. Андан сырткары малга ылайыкталган 2700 чарчы метрлик сарайы бар. Депутаттын жакындары ага караганда бай. Алардын батири, автоборбору, КамАЗ үлгүсүндөгү жүк ташуучу автоунаасы, чиркегичи бар трактор жана Lexus LX470 автоунаасы бар.
КСДП фракциясынын лидери Иса Өмүркуловдун туугандары да бай. Алардын эки үйү, батири, киши жашабаган эки курулуш жана 0,9 гектар жери бар. Андан сырткары туугандарынын эки автоунаасы бар. Өмүркулов өзү деле кедей эмес. Анын 24,61 гектар жери, мал сарайы бар.
"Республика — Ата-Журт" фракциясынын депутаты Бактыбек Сыдыковдун 24 гектар жери бар, ошондой эле СССР учурунда чыккан "Газ-14 "Чайка" лимузини бар.
КСДП фракциясынын депутаты Узарбек Жылкыбаевдин үйү жана 22,8 гектар жери бар. Декларацияга ылайык, депутаттын туугандары башка эл өкүлдөрүнүкүндөй бай эмес, алардын болгону 4 гектар гана жери бар.
