БИШКЕК, 19-июл. — Sputnik. Кыргызстандын мамлекеттик кадр кызматы министрлердин 2015-жылы тапшырган декларациясын жарыялады.
Sputnik Кыргызстан агенттиги декларанттардын жылдык кирешесин карап чыгып, кайсыл министрдин кандай мүлкү жана байлыгы бар экенине кызыгып көрдү.
Каржы министри Адылбек Касымалиев 2015-жылы 1 миллион 395 миң сом киреше тапкан. Кызматынан башка жеке бизнеси, унаасы жана үйү жок.
Экономика министри Арзыбек Кожошевдин дагы жеке турак үйү көрсөтүлгөн эмес. 2015-жылы жалпы 718 миң 878 сом 45 тыйын иштеп тапкан.
Айыл чарба министри Турдуназир Бекбоевдин үй-жайы жок болгону менен ижарага алган беш гектар токой чарбасы бар. Жылдык кирешеси болгону 126 миң 680 сомду түзгөн.
Өзгөчө кырдаалдар министри Кубатбек Боронов бир жылда 734 миң 573 сом 33 тыйын киреше тапкан. Жеке турак үйү, унаасы, бизнеси жок.
Билим берүү министри Элвира Сариеванын жылдык кирешеси 371 миң 958 сом 93 тыйынды түзгөн. Анын батири жок болгону менен дачасы участогу менен бар, жалпы аянты 724 чарчы метрге жетет. Мындан башка 2002-жылы чыккан Honda CRV үлгүсүндөгү авто унаасы бар.
Үй жайлуу министрлер
Юстиция министри Жылдыз Мамбеталиеванын 94,10 чарчы метрлик батири бар. Жеке ишкердик менен алектенбейт. Унаасы дагы жок. 2015-жылы 821 миң 084 сом 87 тыйын тапкан.
Саламаттык сактоо министри Талантбек Батыралиевдин 235,70 чарчы метрлик жер үйү менен батири бар. Бирок декларацияда батирдин аянты көрсөтүлгөн эмес. Ал эми жылдык кирешеси 423 миң 405 сом 01 тыйынды түзгөн.
Маданият министри Алтынбек Максутов 20 сотых жер тилкеси менен жер үйгө жана 3,5 гектар жерге ээлик кылат. Жылдык кирешеси — 462 миң 601сом 13 тыйын.
Эмгек жана социалдык өнүгүү министри Кудайберген Базарбаевдин 78,20 чарчы метрлик батири, 2000-жылы чыккан Mersedes үлгүсүндөгү унаасы жана 15 чарчы метр аянттагы унаа койчу жайы бар. Анын жылдык кирешеси 588 миң 153 сом 58 тыйынды түзгөн.
Белгилей кетсек, ички иштер министри Кашкар Жунушалиев менен транспорт жана жолдор министри Замирбек Айдаров буга чейин башка кызматта болушкандыктан алардын декларациясы жарыяланган эмес.
