БИШКЕК, 19-июл. — Sputnik. Дүйшөмбү күнү Балыкчы шаарындагы жааган мөндүр бир катар чыгымдарды алып келди.
Өкмөттүн Ысык-Көл облусундагы ыйгарымдуу өкүлчүлүгү маалымдагандай мөндүр Тоң жана Жети-Өгүз райондоруна дагы жаап, өрүк-алмаларды күбүп кеткен.
Sputnik Кыргызстан агенттиги табигый кырсыктын кесепетинен жабыркаган карапайым калк менен баарлашып көрдү.
Карапайым калкты мүңкүрөткөн мөндүр…
Балыкчы шаарынын тургуну Инабат Латыпова зыяндын кесепеттери көп эле болгонун айтат.
"Эми гана мөмөсүн терели деп жатканда өрүк, алма, карагаттын баары күбүлүп калды. Абдан ичим ачышып отурам. Ал эле эмес жаңы көктөп келе жаткан мөмөлөр дагы жараксыз болуп калды", — деди Латыпова.
Ал эми Тоң районуна караштуу Бар-Булак айылынын башчысы Мелис Тургановдун айтымында мөндүр эч нерсени аяган жок.
"Катуу жааган мөндүр эч кимди аяган жок. Картошка, буудайдан баштап өсүмдүктөрдүн баары жараксыз болуп калды. Мунун баарын насыя алып жасаган элек. Кайран мээнет текке кетти. Эми кантип насыя төгөм деп отурам", — деди Турганов.
Айыл тургуну Улан Жапаров дагы жабыркагандардын катарында.
"Мен жыл сайын 150 килограммга жакын өрүк алып, алардын килограммын 35 сомдон сатчумун. Быйыл эми ал каражат жок. Мындан сырткары короомдогу картошка, алмурут, буудайдын баары жабыркады", — деди дыйкан.
Өлгөндүн үстүнө көмгөн…Өрүктүн баасы асман чапчыйбы?
Анткен менен Жапаров мөмө-жемиштердин баасы көтөрүлөт деген кептер суу кечпейт деген ойдо.
"Сатууга эч нерсе калган жок. Анан кантип баасы көтөрүлмөк эле", — деди ал.
Ал эми айылдардан өрүк алып, шаарга ташыган Адылбек Кабылдаев өрүккө болгон баа мурункудай эле 25-30 сом болуп жатканын белгилейт.
Эмне кылуу керек?
Айыл тургуну Улан Жапаров насыя маселесине токтолду.
Ал эми өкмөттүн Ысык-Көл облусундагы ыйгарым укуктуу өкүлчүлүгү учурда ӨКМ тарабынан атайын комиссия түзүлгөнүн, ал чыгымдарды иликтеп жатканын билдирди. Маалыматка ылайык, комиссиянын чечиминен соң дыйкандарга жөлөк пул төлөнөт.
