Ал эми 2011-жылы өткөн президенттик шайлоо талапкерлердин жүзгө жакындаганы менен көпчүлүктүн эсинде калган.
Sputnik Кыргызстан агенттиги буга чейин ажолукка чамынгандарды тизмектеди.
Кыргызстан быйыл эгемендүүлүгүнүн 25-жылын белгилейт. Бул мезгил ичинде саясий аба ырайы бирде чайыттай ачык болсо, бирде кара булут каптап турду. Ал ортодо өлкөдө алты ирет парламенттик жана алты жолу президенттик шайлоо өттү.
Тарыхка кайрылсак, 1990-жылы 24-октябрда "Кыргыз ССРинде Президенттик кызматты түзүү жөнүндө" мыйзам кабыл алынып, 27-октябрда парламент Кыргызстандын туңгуч президенти — Аскар Акаевди шайлаган. Андан соң Акаев 1995-жылы жана 2000-жылдары президенттик шайлоолордо утуп чыгып, эки тизгин бир чылбырды эч кимге берген эмес.
Үч талапкер… 1995-жылкы президенттик шайлоодо Акаевдин башкы атаандашы катары Абсамат Масалиев ат салышып, талапкерлердин катарын Медеткан Шеримкулов толуктаган.
Жетинин бири кыдыр… 2000-жылкы президенттик шайлоого ошол кездеги ажо Акаевден сырткары Өмүрбек Текебаев, Алмазбек Атамбаев, Мелис Эшимканов, Турсунбай Бакир уулу жана Турсунбек Акундар катышкан.
Март окуясынан кийинки шайлоо: беш эркек жана бир айым. Ал эми 2005-жылдагы 24-марттагы окуядан кийин Аскар Акаев бийликтен кетип, президенттик жаңы шайлоо өткөн. Анда Курманбек Бакиев менен кошо ажо болом дегендердин катарына Турсунбай Бакир уулу, Акбаралы Айтикеев, Жыпар Жекшеев, Токтайым Үмөталиева жана Кеңешбек Дүйшөбаевдер тизилишкен.
Дагы алтоо, бирок, курам өзгөрдү. Арадан төрт жыл өтүп, 2009-жылы кайрадан өлкө башчысына шайлоо болгон. Анда президенттикке Курманбек Бакиев, Алмазбек Атамбаев,Токтайым Үмөталиева, Жеңишбек Назаралиев,Темир Сариев жана Нурлан Мотуевдер аттанып, жыйынтыгында Бакиев шайланган.
Кезектеги президенттик шайлоо 2017-жылы болот.
