БИШКЕК, 21-июл. — Sputnik. Өлкө аймагында эртең жамгыр жаап, тоолуу аймактарга кар түшөрүн Кыргызгидромет билдирди.
Маалыматка ылайык, 22-23-июлда айрым жерлерде нөшөрлөп жамгыр жаайт. Кээ бир райондордо батыштан соккон шамалдын ылдамдыгы секундасына 18-23 метрге жетиши мүмкүн.
Андан улам абанын температурасы төмөндөйт. Мындай жаан-чачындуу аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда малды кармоону кыйындатат.
Күтүлүп жаткан нөшөрлүү жаан-чачынга байланыштуу республиканын тоолуу жана тоо этектериндеги райондорунда сел жүрүшү ыктымал.
