Мурдагы депутат Урмат Аманбаева камактан бошотулуп, 3 млн. сом айып салынды

БИШКЕК, 29-июл. — Sputnik. Жогорку сот мурдагы депутат Урмат Аманбаеваны камактан бошотконун соттун маалымат кызматы билдирди.

Урмат Аманбаевага карата Башкы прокуратура 2014-жылы 27-октябрда Кылмыш жаза кодексинин "Коррупция" беренеси боюнча кылмыш ишин козгогон.

Ал Ош облустук кургак учукка каршы күрөшүү борборунун башкы бухгалтери болуп турганда мамлекеттик каражатка алынган таңкыс дарылардын колдонулду деген көлөмүн жасалмалап көрсөткөн делинген. 2009-2013-жылдары мамлекетке 17 миллион 263 миң 500 сом зыян келтирилген.

Жогорку соттун жазык иштери жана административдик укук бузуулар жөнүндөгү соттук коллегиясы Урмат Аманабаевага карата 2016-жылдын 19-июлунда токтом кабыл алган. Жогорку соттун соттук коллегиясы Бишкек шаарынын Октябрь райондук сотунун 2015-жылдын 13-ноябрындагы өкүмүн жана Бишкек шаардык сотунун 2016-жылдын 20-апрелиндеги өкүмүн өзгөрткөн.

Аманбаева КР Кылмыш жаза кодексинин 30чу жана 304-беренелери боюнча кылмышка шериктеш болуу жана кызматтык абалынан кыянаттык менен пайдалануу беренелери менен күнөөлүү деп табылып, 30 000 эсептик көрсөткүч же үч миллион сом айып төлөө белгиленди.

Жогорку соттун чечими акыркы жана даттанууга жатпайт.