БИШКЕК, 8-авг. — Sputnik. Түркиянын Конья шаарында Кыргызстандык кыз түрк жараны Муаммер Башактын аттуу жаранды өлтүрүүгө шектелип кармалды. Бул туурасында HaberTurk агенттиги жазды.
Басылма 24 жаштагы эркек кишинин сөөгү 4-августта өзүнүн үйүндө табылганын жана анын өлүмүнө 21 жаштагы кыргызстандык Ханзада аттуу кыз шектелип жаткандыгын билдирген. Маалыматта, кыздын өлгөн киши менен бирге жашагандыгы маалымдалган.
Тартип коргоо кызматкерлерине көрсөтмө берип жаткан учурда кыз күнөөсүн жарым-жартылай мойнуна алып, аны жоолугу менен муунткандыгын айтып берген. Ал үйдөн чыгып бара жатканда өлүк жыттанып кетпеш үчүн желдеткичти иштетип кеткендигин кошумчалаган. Ханзаданын ал кишини эмнеге өлтүргөн себеби ачык жазылган эмес.
Бул ишке кыргызстандык кыздан сырткары Түркиянын Хусейин аттуу жараны шектелип кармалды.
