БИШКЕК, 16-авг. — Sputnik. Бүгүн, 16-августта Рио-де-Жанейро шаарында өтүп жаткан Олимпиадада грек-рим күрөшү боюнча кыргызстандык балбан Руслан Царев чыгат.
1/8 финалдык беттешүү Бишкек убактысы боюнча 19.24тө болот. 66 килограммга чейинки салмак категориясында күч сынаша турган Царевго алжирлик балбан, Африканын учурудагы чемпиону Тарек Азиз Бенайсса атаандаш болот.
Эскерте кетсек, кечээ, 15-августта килемге балбандар Жанарбек Кенжеев менен Мурат Рамонов чыгып, бирок квалификациялык раундда утулуп калышты.
Рио Олимпиадасына Кыргызстандан 19 спортчу аттанып кеткен. Анын 13ү ийгиликти багынта албай, жарыштан четтеп калышты. Азырынча Кыргызстандын куржунунда оор атлетчи Иззат Артыков алып келген бир коло медаль бар.
