Ооматы ообогон Олимпиада. Бразилиядагы жайкы Олимпиада оюндарында оор атлетика боюнча коло медаль тагынган Иззат Артыков допинг менен кармалды. Ал эми спорттук арбитраждык сот (CAS) спортчунун медалы алынарын жар салды. Бул бапестап тапкан балапаныбызды бүркүт жулуп кеткендей эле болду.
Күтүлбөгөн сокку. Бирок Иззат Артыковдун машыктыруучусу Үсөнкан Майназаров мындай болушу мүмкүн эместигин айтып, үмүт шамын жандырып турган чагы. Тажрыйбалуу машыктыруучу тилинен жаңылбаса керек деп туралы.
Эгерде Артыковду медалдан ажыраткан стрихнин тууралуу билгиңиз келсе, бул жактан күтөбүз.
Барга көппөй, жокко чөкпөгөн кыргыз журту өз жашоосун улантат. Борбор калаадагы Фучик көчөсүн бойлой жаңы тосмолор орнотулууда. Бишкек мэриясы бул кадам сентябрь айында өтө турган КМШ президенттеринин саммитине карата даярдык деп түшүндүрдү. Буюрса саммиттин шылтоосу менен короо-жайыбыз оңдолуп калчудай.
Кыргызча сөз таппай, сыйпалап калган учурлар көп эле кездешет. Ал эми киргиздер көп учурда "тошна", "брашка" деген сыяктуу сөздөрдү колдонуп калмай жайы бар. Атайын сизер үчүн синоним сөздөрдү тартуулайбыз. Тез — бат — дароо — ылдам — шак — шарт — чапчаң…
Азыр, азыр… аз калды! Ачабыз…Буга чейин "толук бүттү" делген ат майданы тууралуу карикатура назарыңыздарда.
Кара булут каптаган Түркия. Түркиянын Чыгышында жайгашкан Элазыг аймагында болгон ири жарылуудан алты киши каза таап, 170ке чукул адам жарадар болду.
Жардыргыч зат салынган автоунаа Түркия менен Ирандын чек арасына жакын аймакта жарылып кеткен. Чабуул полициянын бөлүмүнө жасалганы айтылууда.
Акындардын айтышынан чыккан чырга Маданият, маалымат жана туризм министрлиги чекит коет. Буга чейин казактар менен айтыша турган сегиз акындын катарына айтылуу акындардын кирбей калышы көптөгөн нааразычылыктарды жараткан.
Кыргызстандын айрым жерлеринде өткүн өтөрүн Кыргызгидромет билдирди. Бишкек менен Ош шаарларында жаан-чачын күтүлбөйт. Бүгүн 30…32 градус ысык болот экен.
Валюта баасы. Бүгүн сомдун баасы долларга карата орто эсеп менен 68.16 (сатып алуу) жана 68.41 (сатуу) сомду түздү.
Мунай баасы. Бишкекте Аи-95 үлгүсүндөгү бензин 38.30 сом, Аи-92 үлгүсүндөгү май 35.20 сом, ал эми дизель майы 30 сомдон сатылууда.
Соңку сөз ордуна. Белди бекем бууп, көздөгөн максатыңызга бет алыңыз.
Ызаңызды тең бөлүшүп, Исмаил Мамытов.
