Министр: Тамчыдан Чолпон-Атага чейинки жолду оңдоо иштери 28-августта бүтөт

БИШКЕК, 23-авг. — Sputnik. Балыкчы — Корумду унаа жолунун "Тамчы" аэропортунан баштап Чолпон-Ата шаарына чейинки жолду оңдоо иштери 28-августта жыйынтыкталат. Бул тууралуу транспорт жана жолдор министри Замирбек Айдаров өкмөттүн кезектеги жыйынында билдирди.

Өкмөттүн маалымат кызматынын билдирүүсүндө бүгүн премьер-министр Сооронбай Жээнбеков Тарых жана маданият жылына даярдык көрүү жана өткөрүү боюнча уюштуруу комитетинин кезектеги жыйынын өткөрдү.

Анда тийиштүү министрлик жана ведомство жетекчилери өлкөдө өткөрүлө турган ири иш-чараларга — эгемендүүлүктүн 25 жылдыгы, Көчмөндөр оюну жана "Ата-Бейит" мемориалдык комплексиндеги Үркүндө каза болгондордун элесине арналган эстеликтин ачылышына карата даярдыктардын жүрүшү тууралуу маалымат берди.

"Учурда бардык уюштуруу маселелери жана маданий программалар боюнча даярдыктар бекитилген план менен графикке ылайык ишке ашырылууда, каржылоо жагынан көйгөйлөр жок", — деп айтылат билдирүүдө.

Өкмөт башчы иш-чараларды өткөрүү мезгилинде коомдук коопсуздукту камсыздоо маселесине басым жасап, Ички иштер министрлигине тартипти камсыздоо боюнча чараларды күчөтүү тапшырмасын берди.

Транспорт жана жолдор министри Замирбек Айдаров маалымдагандай, үстүбүздөгү жылдын 28-августуна карата Балыкчы — Корумду жолунун "Тамчы" аэропортунан Чолпон-Ата шаарына чейинки тилкени оңдоо иштери жыйынтыкталат.

Ал эми үстүбүздөгү жылдын 26-августунда Чолпон-Ата шаарындагы ипподромдун аймагын ирээтке келтирүү максатында өкмөттүн аппараты көчмө ишембилик өткөрмөкчү.