Ким Чен Ын ракета сынап жатып АКШнын аймактары анын алаканында турганын айтты

БИШКЕК, 25-авг. — Sputnik. Түндүк Кореянын лидери Ким Чен Ын суу алдындагы кайыктардын баллистикалык ракеталарын сыноо учурунда Америкага кыр көрсөткөн билдирүү жасаган. Бул туурасында РИА Новости жазып чыкты. 

Ракеталарды сыноо учурунда ал "буларды учуруу технологиясы абдан өнүккөндүгүн", "АКШнын аймактары жана Тынч океандагы ыкчам иш-аракеттерди жасоо анын колунда тургандыгын" ишенимдүү айткан. Бул туурасында Кореянын борбордук телеграф агенттиги жазып чыккан. 

Мындан сырткары, Ким Чен Ын ракетанын учуруу коопсуздугун, кыймылдаткычтын күчү мыкты экендигин, бутага алуу тактыгын жана жок кыла турган мүмкүнчүлүгүн баса белгилеген. 

Кечээ Түндүк Корея суу алдындагы кайыктардын баллистикалык ракеталарын сынаган. Ал 500 чакырым аралыкка учуп, суунун алдына 80 метрге чейин тереңдеп, Япониянын чек ара жана ички аймагына да кирип кеткен. Муну Токио аталган өлкөнүн олуттуу коркунучу катары кабыл алды. 

Эксперттердин айтымында, Түндүк Корея ракета технологиясы боюнча бир топ өнүктү. Эми алардын учуулар боюнча сыноолорду көп жасап жаткандыгы айтылууда.