БИШКЕК, 26-авг. — Sputnik. Италиядагы зилзаладан жабыр тарткандарды издөө иштери уланууда, куткаруучулар уранды алдынан 238 адамды алып чыкты. Бул туурасында РИА Новости кабарлады.
Рим шаарынын Жарандук коргонуу боюнча кызматынын өкүлү Иммаколата Постильоненин айтымында, куткаруучулар буга чейин 215 кишини уранды алдынан алып чыккан. Ага кошумча Италиянын альпинисттик клубунун кызматы тирүү калган 23 кишини сактап калган.
Эске салсак, магнитудасы 6,0гө жеткен биринчи жер титирөө 24-август күнү саат 3.36да Аккумоли шаарына жакын жерде катталган. Магнитудасы 5,4кө жеткен экинчи силкинүү саат 4.34 чамасында Умбрия облусунда болгон. Анын кесепетинин Аккумоли менен Аматриче шаарлары кыйрап калган. Табигый кырсыктын айынан аталган эки калаадан сырткары Лацио, Умбрия жана Марке облустарында дагы кыйроолор болгон. Өлкө бийлиги жашоочуларды жабыркагандар үчүн кан тапшырууга чакырды.
