БИШКЕК, 27-авг. — Sputnik. Премьер-министр Сооронбай Жээнбеков Ысык-Көл облусуна жасаган сапарында Балыкчы-Чолпон-Ата-Корумду жолунун курулушундагы кемчиликтерди белгилеп, жумуштун сапатына көңүл бурууну эскертти. Андан ары Кырчын жайлоосуна барып, II Дүйнөлүк көчмөндөр оюндарына даярдыкты текшерди.
Өкмөт башчы алгач, Балыкчы шаарындагы Жусуп Абдрахманов атындагы борбордук көчөнүн курулуш иши менен таанышып, кетирилип жаткан кемчиликтерди көрсөттү. Жол четине тосмолордун сапатсыз коюлганын өзү басып барып көрсөтүп, кемчиликтерди жоюп, аткарылган жумушту сапатына өзгөчө көңүл бурууну тапшырды.
Андан ары Тамчы айылында жайгашкан Балыкчы-Чолпон-Ата-Корумду жол тилкесинин курулуш иштеринин жүрүшү менен таанышты.
Ал эми Балыкчы-Чолпон-Ата-Корумду жолунун курулушу 2017-жылдын августунда толугу менен бүткөрүлүшү керектигин кошумчалады.
Өкмөт башчы II Дүйнөлүк көчмөндөр оюндарынын алкагында спорттук ат оюндары жана майрамдык иш чаралар өтүүчү Кырчын жайлоосуна барды. Ал жерден 28-августка чейин Кырчын жайлоосундагы этно шаарчанын орун алышына байланышкан бардык маселелерди чечүүнү белгиледи.
Премьер-министр тийиштүү министрлик жана ведомстволорго II Дүйнөлүк көчмөндөр оюнуна карата бардык даярдыктарды белгиленген мөөнөттө бүткөрүүнү тапшырды.
Андан соң Жээнбеков Бактуу-Долоноту айылындагы II Дүйнөлүк көчмөндөр оюндарына карата салынып жаткан ат майданын текшерди.
