БИШКЕК, 7-сен. — Sputnik. Дүйнөлүк көчмөндөр оюнунун эртең, 8-сентябрда боло турган жабылуу салтанатына билеттер бүгүн түнкү саат 12.00гө чейин сатыла турганын ДКО катчылыгы билдирди.
Билет сатып алуу үчүн жарандардын өздүгүн тактаган паспорт, айдоочулук күбөлүк сыяктуу документтер талап кылынат.
Билет саткан кассаларда атайын техникалар орнотулган. Анда жарандар сүрөткө тартылып, системага сакталып калат. Жарандардын аты-жөнү документтеги жазууга шайкеш келүүсү абзел. Бул процесстерден кийин ар бир жаранга өзүнчө код берилип, ал билетке чапталат.
Аземге барганда жарандардын пин-кодун машинага такаганда экрандан алардын өздүгү тууралуу маалымат чыгат. Жарандын бети кайрадан сүрөткө тартылып, мурдагы сүрөтү менен салыштырылат. Дал келсе кирүүгө уруксат берилет.
