БИШКЕК, 12-сен. – Sputnik. Түркиянын чыгыш тарабында жайгашкан Ван аймагында автоунаа жарылып, андан 27 киши жабыркап, экөөнүн абалы оор бойдон калууда. Бул туурасында Вандын Коопсуздук кызматынын мүдүрү Суат Экижинин айткандарына таянып, Sputnik Түркия кабарлады.
Түркиялык басылмалардын маалыматына караганда, бүгүн провинциянын администрациясынын жанынан автоунаа жардырылган. Ал жерге жакын аймакта Адилет жана Өнүгүү партиясынын аймактык бөлүмү жайгашкандыгы кабарланды. Жарылуудан имарат гана жабыркабай, жакын жайгашкан үйлөрдүн айнектери күбүлүп, дубалдарынан жарака кеткен.
Кырсык болгон жерде полиция иш алып барып, Тез жардам автоунаалары жарадарларды ооруканага алып кеткендиги кабарланды.
Бийлик жардырууна Күрдстан жумушчу партиясы жасады деген пикирин айтууда.
Түркия бийлиги ишмердүүлүгүнө тыюу салынган Күрдстан жумушчу партиясын өлкө ичиндеги көптөгөн терактыларды уюштурган деп айыптап келет. 2015-жылы КЖП менен кагылышуудан 700 аскер жана милиция кызматкерлери каза тапкан. Ал эми өлкө бийлиги бүгүнкү күнгө чейин 6000ден ашуун козголоңчуну жок кылганын айтып келет.
