БИШКЕК, 13-сен. — Sputnik. Геологиялык экспедициянын жүрүшүндө Ысык-Көлдө буга чейин табылган мамонттун башка калдыктары да табылганын Улуттук илимдер академиясынын палеонтологу Айзек Бакиров Sputnik Кыргызстан агенттигине билдирди.
Бакиров жергиликтүү тургундар мамонттун азуу тишинин бир бөлүгүн арыкка салып катып койгонун айтат. Катылган тиштин узундугу 50 сантиметрдей болгону менен анын жарымы упурап, калганын атайын суюктуктун жардамы менен сактап калууга мүмкүн болгонун маалымдады.
Андан сырткары, Тепке айылынан дагы байыркы жаныбарлардын калдыктары болушу мүмкүн деген сөөктөр табылган.
"Экспедиция учурунда сөөктөр табылды, бирок алардын табияты белгисиз. Баш сөөгү же дене мүчөсүнүн толук бөлүгү болгондо анын кайсы жаныбарга таандык экенин билүүгө мүмкүн болмок. Биздин божомолубузда алар дагы мамонт жашаган доордогу төөнүн, аттын же бизондуку болушу мүмкүн. Алардын баары лабораториялык изилдөөлөрдүн жыйынтыгы менен гана эмне деген жаныбардыкы экени аныкталат", — деди ал.
Бакиров буга чейин табылган мамонттун азуу тиши катырылган боюнча сакталып жатканын кошумчалап, аны изилдөө иштери лабораториялар даяр болгондо башталарын баса белгиледи.
