БИШКЕК, 15-сен. — Sputnik. Бишкектин Бакаев менен Айни көчөлөрүнүн кесилишинде Москвадагы өрттөн каза болгондордун элесине арналып аллея ачылып, ага бак отургузула турганын мэрия билдирди.
Буга чейин социалдык тармактар аркылуу Бишкекте арабыздан эрте кеткен кыз-келиндерге арналган аллея ачуу демилгеси көтөрүлгөн.
"Мэр Албек Ибраимов шаардыктардын демилгесин колдоп, муниципалдык кызматтарга аймак бөлүп берип, бак отургузуу жаатында жардам берүүнү тапшырды", — деп айтылат билдирүүдө.
Бул демилгеге чет жакта жүргөн кыргызстандыктар да кошулган. Кайрылууга 561 шаар тургуну кол койгон.
Эскерте кетсек, 27-август күнү Москвадагы "Печатный экспресс" басмаканасында өрт чыгып, андан 14 кыргызстандык кыз-келин жана россиялык үч аял каза болгон.
